Mót-10. Mosó. 28. júlí, 2025.

Tíunda keppni sumarsins fór fram í roki og rigningu á Hlíðarvelli síðasta mánudag (28. Júlí). Þrátt fyrir leiðindaveður mættu níu spilarar til leiks og létu ekki veðrið á sig fá. Hafandi sagt það þá var skorið ansi lágt eða aðeins 26,4 punktar að meðaltali. Það er lægsta meðalskor sumarsins og nokkru verra en í strekkingnum í Grindavík (27,7) fyrr í sumar til samanburðar. Sumir kunna þó vel við sig í roki og rigningu.

 

Það er óvanalegt að sjá hærra meðalskor á fyrri níu (13,3 p.) vs seinni níu (13,1 p.) eins og reyndin var í þetta skiptið. 

 

Læknirinn kom á óvart og sigraði veðrið og vallaraðstæður og náði 36 punktum. Hrikalega vel gert. Gauti hefur verið að laumast upp töfluna með leynd (svarti hesturinn) og er nú kominn í toppbaráttuna. Hergeir spilar sjaldan betur en í roki og rigningu og skilaði 34 punktum í hús. Viktor var svo með 31 punkt en aðrir voru með undir 30 punktum.

 

Hergeir átti stórkostlegt innáhögg á holu 1, setti eitt fet frá holu af ca 150 metra færi í hörkuvindi. Auðveldur fugl í höfn og 4 punktar eftir eina holu. Svona glæsihögg verðskuldar aukastig.

 

Í heildarstigakeppninni er Hergeir núna kominn í forystu, Gauti er kominn í annað sætið og Tryggvi í því þriðja. Þess má geta að nú eru fyrstu menn, frændurnir Haffi og Hergeir, komnir með 10 keppnir undir belti. Heildarstigaskor byggir á 10 bestu keppnunum og því fer pakkinn að þéttast á næstunni. Ef litið er til hæsta meðalskors pr. Keppni breytist röðun efstu manna á þann hátt að TT er efstur (10,1 p), Gauti og Tóti jafnir í öðru (9,1 p) og Hergeir í fjórða (8,7 p.). 

 

ÚRSLIT:

STAÐAN:

Mót-9. Brautarholt. 21. júlí, 2025.

Áfram mallar mótaröðin og nú er komið að umfjöllun um níunda mót sumarsins sem var haldið 21. júlí á nývígðum 18 holu velli í Brautarholti.

Áður höfðu 12 holur verið spilaðar á Brautarholti en nú eru 6 nýjar brautir komnar til viðbótar. Og þvílíkar brautir og þvílíkur völlur. Ég held að ég tali fyrir hönd margra að þarna sé kominn flottasti 18 holu völlur landsins. Og í tilefni þess var skellt í Stórmót. 

Vallaraðstæður voru góðar; hægviðri, nokkuð hlýtt en þykk gosmóða lá yfir höfuðborgarsvæðinu þennan mánudag. Brautarholtið er engu að síður erfiður völlur og það sást á skorinu því meðalpunktasöfnun spilara var 28,7 p eða tæpum 6 punktum lægri en vikuna áður á Hlíðarvelli.

 

Þrátt fyrir mismunandi skor þá skemmtu menn sér hið besta þetta fallega sumar síðaftan utan að það fréttist af einum spilara sem flýtti sér af vettvangi eftir hringinn þannig að hann myndi ekki drepa neinn sökum svengdar. Við nefnum engin nöfn en málaranestið hefur greinilega klárast snemma þennan daginn .

 

11 spilarar voru mættir til leiks og segja má að úrslitin hafi ráðist á seinni níu holunum og þar með sex nýju holunum. Haffi og Viktor  leiddu eftir fyrri níu holurnar með 20 og 18 punkta en skitu rækilega í brók á seinni níu og gáfu eftir toppsætin. Tommi, Gauti og Hergeir héldu hins vegar vel á spöðunum á seinni níu og löndu þremur efstu sætunum. Tómas spilaði fanta vel 35 punktum. Gauti og Hergeir voru jafnir með 33 punkta en Gauti hafði betur á seinni níu. 

 

Þar sem tveir efstu menn mótaraðarinnar eftir átta umferðir voru fjarverandi var viðbúið að leikar myndu jafnast eitthvað eftir þessa keppni. Tryggvi leiðir mótið ennþá en Hergeir er hástökkvari vikunnar og er kominn í annað sætið fast á hæla Tryggva. Haffi og Gauti eru síðan jafnir í 3ja sæti.  Enn eru allmörg mót eftir á sumrinu og því næg tækifæri til að blanda sér í baráttuna.

 

ÚRSLIT:

STAÐAN:

 

Mót-8. Mosó. 14. júlí, 2025.

Áttunda keppni sumarsins átti að fara fram 7. júlí á Hlíðarvellinum en þann dag kom gul veðurviðvörun, mikill blástur og gerði hellirigningu seinnipartinn. Keppninni var því blásið af. Þetta er í annað sinn í sumar sem hætt hefur verið við mánudagsgolf vegna veðurs. Það er afar óvanalegt og sér í lagi þar sem verðrið í sumar hefur að mestu leyti verið með miklum ágætum.

Það sannaðist þann 14. Júlí þegar keppnin fór fram á heitasta degi sumarsins.  Bongóblíða, 18-20 stig, léttskýjað og lítill vindur, 11 spilarar voru mættir til leiks og árangurinn lét ekki á sér standa.

 

Spilamennskan var mjög góð. Meðalstigasöfnun spilara á hringnum var 34,4 p en það er næst hæsta punktasöfnun á mótaröðinni í ár og aðeins 0,1 p undir besta meðalskorinu frá 19. maí . Lægsta skorið (Júmbósætið) var 30 punktar en til samanburðar þá dugðu 30 punktar til 3ja sætis í Grindavík 2 vikum áður.

 

Menn mættu misvel græjaðir til leiks í blíðunni. Fótabúnaður Jóa var þó allsérstakur og lék hann á forláta inniskóm þar sem golfskórnir gleymdust í Hveragerði. Að auki skar hann smá tíma af stórafmæli bróður síns til að mæta á golfvöllinn (alvöru dedication) og fær hann aukastig að launum.

 

Siggi Ás rústaði keppninni með súperhring og fékk 43 punkta. Þar af fékk hann 23 punkta á átta holum á fyrri níu. Hreint frábær árangur! Haffi og Tryggvi komu næstir með 38 p. Haffi hafði betur í skrifstofubráðabana (betri síðustu 6 holurnar) og hlýtur því 2. Sætið og Tryggvi það þriðja. Tryggvi heldur áfram að spila fantavel og er nú með 10 stiga forskot í heildarkeppninni.

 

ÚRSLIT:

STAÐAN:

 

Mót-7. Grindavík. 30. júní, 2025.

Sjöunda mót sumarsins var fært til Grindavíkur vegna Meistaramóts á Hlíðarvelli. Ekki var um stórmót að ræða þar sem það hafði þegar verið haldið stórmót í júní tveimur vikum áður á Akranesi.

Grindavík tók hressilega á móti níu spilurum og bættust allmörg vindstig í verðið á leiðinni úr bænum. Menn voru því að berjast við hvassan vind allan tímann og komu all veðurbarðir í hús eftir hringinn.

 

Eiginlega hefðu allir níu átt skilið aukastig fyrir að þrautseigjuna að klára hringinn en Salamónsdómurinn er að enginn fær aukastig í þetta skiptið.

 

Skor var með lægsta móti (tæplega 28 p að meðaltali) og aðeins þrír náðu 30 punktum eða meira, Tryggvi með 34 p, Halli með 32 p. Og Tóti með 30 punkta. Glæsilega gert í krefjandi aðstæðum.

 

Tryggvi er kominn á mikið flug og hefur náð forystu í heildarstigakeppninni með 5 stiga forskot á Tóta í 2. sæti.

Beita þurfti skrifstofu bráðabana í tvígang. Gauti hafði Sigga með betri síðustu 6 holurnum. En einna mest spennandi keppnin var milli Hergeirs og Jóa Fel um Jumbósætið. Báðir áttu erfiðan dag með aðeins 24p. Báðir voru með 12 og 12 á fyrri og seinni. Báðir voru með 7 á fyrstu 3 holunum á seinni níu og sama punktafjölda á seinni 6 og seinni þremur. Þurfti því að grípa til þess ráðs að skoða árangur á 18. Holu til að skera úr um sigurvegarann. Báðir spiluðu þar par 3 holu á fimm höggum. Jói átti forgjöf á holuna og fékk einn punkt en Hergeir engan. Þessi æsispennandi Jumbókeppni lauk því með sigri Jóa Fel.

 

ÚRSLIT:

STAÐAN:

Mót-6. Mosó. 23. júní, 2025.

Eftir heimsóknina til Akraness var aftur haldinn á heimahaga á Hlíðarvöllinn í Mosó þar sem 6. keppni sumarsins fór fram.

Aðstæður til golfiðkunar voru frábærar, blautt gras til að byrja með, ágætlega hlýtt og nánast logn.  

 

Tíu spilarar reyndu með sér og skorið var allgott. Meðalpunktasöfnun var 31,4 p. sem er tæplega 5 punktum hærra meðalskor en á Akranesi vikuna áður. 8 af 10 spilurum voru með 30 punkta eða meira. Mönnum líður greinilega vel á heimavelli.

 

Enginn spilaði þó betur en málarinn síkáti sem var nýkominn heim ferskur úr æfingabúðum frá K-club, eða Gay club ;-) á Írlandi. Jöfn og góð spilamennska hans (18+18) skilaði honum 36 punktum og toppsætinu. Haffi og Tryggvi komu næstir með 34 punkta hvor en Haffi átti betri seinni níu (20 p.) og hreppir því 2. sætið þessa vikuna. 

 

Í lokahollinu (Haffi, Jói, Viktor og Tommi) komu þrír fuglar fram. Viktor á 4 holu, Jói á 7 holu og Haffi með chip ofaní á 14 holu. Mikil pressa var sett á Tomma að landa líka fugli á síðustu holunum til að fullkomna fernuna en það gekk ekki eftir í þetta sinn. 

 

Afar óvanalegt atvik átti sér stað á 17. Holu þar sem brautarhögg Haffa lagðist klesstur að bolta Viktors ca. 70 metra frá flötinni. Myndin hér meðfylgjandi sýnir stöðu boltanna tveggja. Þessi undur þóttu útheimta aukastig og fá eigendur boltanna sitthvort aukastigið.

 

Vaskleg framganga Tryggva í undanförnum mótum hefur fleytt honum upp töfluna svo um munar og er hann nú í öðru sæti aðeins einu stigi á eftir Viktori. Tóti kemur svo einu stigi þar á eftir í 3ja sæti. Afar jafnt er á toppnum því Hergeir í 4. Sæti er aðeins 4 stigum frá toppsætinu.

 

 

 

 

 

 

 

 

 

 

 

ÚRSLIT:

STAÐA:

Mót-5. Skaginn. 16. júní, 2025.

Blásið var til stórmóts í fimmtu keppni sumarsins. Haldið var upp á Skaga og spilað þar við prýðilegar aðstæður.  10 spilarar voru mættir til leiks en einhverjir voru erlendis í æfingabúðum.  Ingvar lét loks sjá sig á mótaröðinni og eru þá allir spilarar á listanum komnir á blað.

 

Spilamennskan var upp og ofan, en heldur meira ofan samt. Meðalstigasöfnun spilara á hringnum var aðeins 26,7 p en það er lægsta punktasöfnun á mótaröðinni í ár. Hæsta meðalpunktasöfnun pr. spilara var 19. Maí sl en þá reyndist hún vera heild 34,5 p.

 

Það hvarflaði að tíðindaritara að ógilda eitt hollið á hringum þar sem þeir skiluðu inn skori á ævafornan hátt, blað og blýant. Bent skal á nú er árið 2025 runnið upp og einungis er tekið við skori á rafrænan hátt. Aðrar skilaaðferðir líkt og skeytasendingar, fax og mors-hnit eru vinsamlegast afþökkuð.

 

Tryggvi lék manna best þetta skiptið og landaði 37 p. og efsta sætinu. Hergeir (33 p) og Gauti (32 p.) komu í næstu sætum þar á eftir. Þessi tíðindi þétta stöðutöfluna talsvert og nú eru fleiri farnir að blanda sér í baráttuna. Tóti velti Viktori af toppnum en það munar aðeins einu stigi á milli þeirra.

 

Lítið var rætt eftur hringinn enda framorðið, miðaldra menn orðnir þreyttir og búið að loka barnum. Heyrðust þó tíðindi af Haraldi víðförla sem sló fallegt innáhögg á flöt og fagnaði um stund þar til honum var bent á að hann ætti reyndar að spila á næstu flöt við hliðina (samliggjandi flatir). Halli hlýtur aukastig fyrir skemmtilegan misskilning og fær aukastig að launum sem tvöfaldast vegna stórmóts.

 

ÚRSLIT:

STAÐAN:

Mót-4. Mosó. 9. júní, 2025.

Fjórða keppni sumarsins fór fram við vindasamar og kuldalegar aðstæður þann annan í Hvítasunnu á Mosó sl. mánudag. Keppni vikunnar áður var felld niður vegna storms. Mætingin var með besta móti, 12 spilarar mættir og í fyrsta sinn í sumar fóru einhverjir stigalausir heim , þ.e. utan mætingapunktar. Haukur og Hanna mættu til leiks í fyrsta sinn í sumar og eru þau boðin sérstaklega velkomin. Allir sauðirnir hafa þá skilað sér til húsa utan Ingvar en óvíst er með stöðuna á honum eftir handarbrot í vetur.

 

Blásturinn og aðstæðurnar höfðu sýnileg áhrif á spilamennskuna, því aldrei hafa færri punktar dugað fyrir sigri á mánudagsmótaröðinni í ár. Tveir voru hæstir með 31 punkt, Tóti og Eggert. Skrifstofubráðabaninn var æsispennandi, báðir jafnir á seinni níu, báðir jafnir á síðustu þremur holunum en Tóti hafði betur með hærra skor á síðustu 6 holunum. Púttin hjá Tóta hafa verið með afbrigðum góð í sumar og hann er núna farinn að anda ofan í hálsmálið á Viktori í heildarstigakeppninni. Bæði Viktor og Tóti hafa unnið tvær mánudagskeppnir það sem af er.

 

Spilarar fara misjafnlega hratt af stað í stigasöfnun. Athygli vekur að Ásinn tekur því rólega. Bent skal á að Ásinn getur bæði verið hæsta og lægsta spilið eftir því hvað verið er að spila hverju sinni. Enginn skyldi því afskrifa Ásinn strax. Mögulega einhver sálfræðihernaður í gangi ;-)

 

ÚRSLIT:

STAÐAN:

Mót-3. Mosó. 26. maí, 2025.

Þriðja keppni sumarsins fór fram í eins góðu golfveðri og hægt er að biðja um og því ákveðin synd að aðeins átta spilarar mættu til leiks. Hlýtt og dúnalogn, smá væta á vellinum. Til að vega upp á móti frábærum spilaaðstæðum þá ákvað einhver vallarstarfsmaður (líklega í vondu skapi) að setja holustaðsetningar á vellinum á eins andstyggilega staði og mögulegt er. Það heppnaðist ágætlega í að halda skorinu lægra en annars hefði orðið.  Annað skiptið í röð hófust leikar á 10. holu. Tryggvi bísnaðist talsvert yfir þessum viðsnúningi áður en leikar hófust en það virtist ekki hafa mikil áhrif á hann því hann spilaði solid golf. Menn í hollinu tóku eftir að TT notaði fjarlægðarmælingar mikið og reiknaði högglengd af slíkri nákvæmi að undrum sætti. Það kom þó aðeins á kappann á seinni níu þegar hann uppgötvaði að hann hafði gleymt að snúa vellinum við í tækjum sínum og mælingar á fyrri níu voru því kannski ekki jafn nákvæmar og hann hafði áætlað ,  TT mælist því með aukastig í þetta sinn.
Tóti spilaði frábært golf á 40 p. og sérstaklega voru púttin ótrúleg. Sullaði flestu ofaní ef hann var annaðborð kominn á flötina.  Gauti spilaði einnig mjög vel og skilaði sér inn á 36p og landaði öðru sætinu. Viktor gefur lítið eftir og landaði 3ja sætinu (sigraði TT á betri seinni 9) og dýrmætum 8 stigum í hús og viðheldur góðri forystu í heildarstigakeppninni.  

ÚRSLIT:

STAÐA:

Mót-2. Mosó. 19. maí, 2025.

Önnur keppni sumarsins fór fram í dandalablíðu 19. maí en elstu menn muna ekki aðra eins veðurlíðu í maí á Íslandi frá landnámsöld.  Vellinum hafði verið snúið og hófust leikar á 10. Holu. Veðrið og viðsnúningurinn fór misjafnlega í spilara, sumir þornuðu upp og fengu sólsting en öðrum óx ásmegin. Engum þó meira en Viktori sem er enda nýkomin úr heiðríkjunni a Spáni og kann vel við sig við svona aðstæður. Skipti engum togum að hann hesthúsaði 45 stigum á hringnum (23 á fyrri og 22 á seinni).  Viktor burstaði keppnina annan mánudaginn í röð og hefur tekið afgerandi forystu á mótaröðinni. Ljóst er að aðrir spilarar þurfa að fara að grafa djúpt eftir frammistöðum til að halda í við kappann.

 

Eggert og Halli náðu einnig fínum hringjum með 39 punkta þar sem Eggert hafði betur á seinni níu. 

 

Tveimur tilþrifum var lýst í skálnum sem þóttu bæði verðskulda aukastig. Eggert sló 3ja högg sitt úr glompu á braut eitt (eins og margir hafa lent í) en skipti engum togum að hann þrumaði beint í stöngina sem annars hefði farið vel framyfir holuna og boltinn steindó og datt beint niður en stoppaði á brúninni og var hársbreidd að fara ofaní fyrir fugli. Af mörgum glæsilegum höggum Viktors þennan dag var 4ja höggið á 13. holu þó einkar glæsilegt. Hann hafði verið í smá brasi í brautarhöggunum á holunni og lenti utanbrautar (vinstra megin) í höggi tvö. Náði hann að redda sér vel í 3ja höggi og lá boltinn ofan (hægra megin) við flötina, rétt þar sem gengið er upp á 14. Teig. Skipti engum togum að hann sippaði boltanum þaðan beint í holu fyrir fugli af ca 20-25 metra færi. 

 

Stigaskor umferðarinnar og heildarstaða í keppninni má sjá hér að neðan. Þrír spilarar hafa enn ekki mætt til leiks. 

 

ÚRSLIT:

STAÐA:

Mót-1. Mosó. 12. maí, 2025.

Keppnistímabilið er formlega hafið (fagn). Spilað var á Hlíðarvelli þann 12. maí í frekar þokkalegu veðri til að byrja, ca 10 gráður en talsverður blástur. Eftir fáeinar holur snarkólnandi þegar dró fyrir sólu. Komu sumir (lesist Eggert) norpandi í skálann og blésu í kaun. 10 spilarar mættu til leiks en einhverjir voru fjarverandi vegna meiðsla.

 

Viktor lét kalsann ekki á sig fá, enda nýkominn heim úr æfingabúðum frá Spáni og landaði flottum sigri með 39 punkta. Annað árið í röð sigrar Viktor fyrsta mót sumarsins. Í fremsta hollinu voru leikar ansi jafnir því Haffi, Tómas og Jói Fel skiluðu sér allir inn á 36 punktum. Skrifstofubráðabaninn dæmdi Haffa í annað sætið, Tomma í það þriðja og Jóa Fel í fjórða.

Tommi mætir til leiks í vel reimuðum skóm því hann er nú á fyrsta móti sumarsins kominn með fleiri stig (9) en í öllum spiluðum mótum hans í maí og júní í fyrra samanlagt (8 stig). Afslöppuð sveifla Jóa Fel vakti athygli en boltinn sveif gríðarlega langt í upphafshöggunum og á kappinn gott í vændum ef hann heldur þessum stíl áfram. Tíðindamanni er kunnugt um tvo fugla á hringnum, annar hjá Hergeir á 13. holu (par 5) og hinn hjá Írunni á 11. holu (löng par 4). Virkilega vel gert sem skilar þeim sitthvoru aukastiginu.

 

PS. 

Leiðrétting eftir kærur:

Ég sé að tíðindamaður var í ruglinu með fuglana og fékk ekki nándar nærri allar upplýsingar á 19. Holu um fugla á hringnum. Ég treysti því að allir fuglar séu komnir fram.

Ég var sjálfur í brasi með bunker högg á 18. Holu og var ekki að fylgjast náið með Jóa en hann átti vissulega frábært innáhögg á 18. og setti fugl þar.

Varðandi Viktor og hans tvo fugla á 4. Og 5. Braut þá var aukastig í þetta sinn hugsað fyrir þá sem settu fugl á hringnum en ekki aukastig pr. hvern fugl.

Jói Fel og Viktor fá 1 aukastig fyrir að setja fugl á fyrsta hringnum.

Ég vil taka skýrt fram að þessi aukastig fyrir fugla eiga bara við fyrir fyrsta hringinn. Þau eru ekki komin inn sem staðalbúnaður fyrir næstu hringi. 

Aukastig geta verið gefin fyrir ólíka hluti, svo sem góð eða skemmtileg tilþrif, bestu söguna í skálanum, flottasta klæðnaðinn, hrakfallastig ofl. Forsendur aukastiga eru ákveðin með ólíkum hætti í hvert sinn.

 

ÚRSLIT:

STAÐA: